Қаһар Бинахметов 
Бразилия Жоғарғы соты бұрынғы президент Жаир Болсонаруды билікті күшпен басып алуға әрекеттенгені үшін кінәлі деп танып, 27 жыл 3 айға бас бостандығынан айырды, деп жазады ZontNews.kz.
Судьялардың үшеуі 70 жастағы саясаткерді бірнеше бап бойынша кінәлі деп тапты. Оған тағылған айыптар: қарулы қылмыстық топқа қатысу, билікті күшпен құлатуға әрекет ету, мемлекеттік төңкеріс ұйымдастыру, мемлекеттік және мәдени нысандарға зиян келтіру. Бір судья оны ақтаса, тағы біреуі дауыс беруден бас тартты. Бұл шешім Болсонаруға үкімді апелляцияға беру мүмкіндігін қалдырады. Соңғы шешім 2026 жылғы президенттік сайлауға жақын қабылдануы ықтимал.
2023 жылғы 8 қаңтарда саясаткердің жақтастары Лула да Силва президент қызметіне кіріскеннен кейін Конгресс, Жоғарғы сот және президент сарайын басып алған болатын. Айыптау нұсқасы бойынша, Болсонару билікті сақтап қалуға арналған «Жасыл және сары қанжарлар» деп аталатын жоспарды әзірлеуге қатысқан. Бұл жоспарға Луланы улау, сондай-ақ вице-президент Жералду Алкмин мен Жоғарғы сот судьясы Александре де Мораесті өлтіру әрекеттері енгізілген.
Жаир Болсонару өзіне тағылған барлық айыптарды жоққа шығарады.
Шілдеде оған электрондық білезік тағылып, түнде үйден шығуға және әлеуметтік желілерді пайдалануға тыйым салынды. Тамыздың басында бұрынғы президент онлайн-жиын өткізгені үшін үйқамаққа ауыстырылды.