Қаһар Бинахметов 
Қазақстанда «қолма-қол» немесе бейресми түрде берілетін жалақыны азайтуға бағытталған жаңа заң жобасы дайындалып жатыр, деп жазады ZontNews.kz.
Еңбек және халықты әлеуметтік қорғау министрі Светлана Жақыпова Мәжілісте сөйлеген сөзінде құжат жұмыс берушілерді қызметкерлерінің нақты табысын декларациялауға міндеттейтінін мәлімдеді. Оның айтуынша, кейбір жоғары білікті мамандардың ресми айлығы 85 мың теңге болып көрсетіліп, қалған бөлігі бейресми түрде төленеді.
«Мұндай тәжірибенің алдын алу үшін еңбек қатынастарын декларациялау заң жүзінде бекітілуі қажет», – деді министр.
Жақыпова Сингапур мен Швеция тәжірибесін мысалға алып, бірдей біліктілігі бар қызметкерлердің жалақысындағы айырмашылық 220 мыңнан 1,2 миллион теңгеге дейін жететінін атап өтті.
Министрліктің деректері бойынша, Қазақстанда 329 мың адам 80 мың теңгеден аз, ал 708 мың адам ең төменгі 85 мың теңге көлемінде айлық алады. Ведомство тексерістері кейбір жұмыс берушілердің ресми төлемдерді төмендетіп көрсетіп, салықтан жалтарып, адамдарды заңсыз еңбекке тартатынын анықтаған.
Сол күні Мәжіліс Халықаралық еңбек ұйымының №131 Конвенциясын ратификациялады. Құжат жұмысшылардың қажеттіліктерін ескеру, кемсітуді болдырмау және ең төменгі жалақы жүйесін бекітуді көздейді.