Қаһар Бинахметов 
Атыраудағы Жилгородок ықшамауданында орналасқан Ленин ескерткішінде жарықтар байқалды, деп жазады ZontNews.kz.
1981 жылы орнатылған бұл монумент 2009 жылы тарихи-мәдени мұра нысандарының тізімінен шығарылғанымен, содан бері сақталып келген, деп хабарлайды Orda.kz.
Атырау облысының мәдениет басқармасы ескерткіштің тарихи құндылығы жоқ екенін түсіндірді.
«Бұл құрылыс мәдени мұра мәртебесін баяғыда жоғалтқан. Қоғамдағы түрлі пікірлерге байланысты сақталып келгенімен, апатты жағдайына байланысты сүру мәселесі қазір өзекті болып тұр», – деді ведомствода.
Қала тұрғындарының ойы екіге бөлінді. Бір бөлігі ескерткішті алып тастап, орнына демалыс аймағын жасауды қалайды. «Жаңадан балалар алаңы немесе фонтан салған әлдеқайда тиімді. Жастар мен отбасыларға бұл көбірек пайда әкеледі», – дейді қала тұрғыны Айман Қайрат.
Ал басқалары ескерткішті сақтауды дұрыс санайды.
«Кеңес дәуіріне көзқарасымыз әртүрлі болуы мүмкін, бірақ бұл – қаланың тарихының бір бөлігі. Жөндеуден өткізіп, мәдени нысанға айналдыруға болады», – дейді зейнеткер Серік Мұхит.
Әлеуметтік желілерде де қызу пікірталас жүріп жатыр: біреулер жергілікті тұлғаға арнап жаңа ескерткіш қоюды ұсынса, енді біреулер оны қала символы ретінде қалдыруды талап етуде.
Ескерткіштің болашағы әзірге белгісіз. Қалалық әкімдік – оны бұзу немесе сақтап қалу жөнінде соңғы шешім қабылдауы тиіс.