Қаһар Бинахметов 
Украина президенті Владимир Зеленский Ресей басшысы Владимир Путиннің Мәскеуде кездесу өткізу туралы сөзіне пікір білдірді, деп жазады ZontNews.kz.
Парижде Франция президенті Эммануэль Макронмен бірлескен баспасөз мәслихатында Зеленский сөз сөйледі.
«Меніңше, кездесуді қаламасаң, Мәскеуге шақырасың. Ресей кездесу туралы айта бастады — бұл жаман емес. Бірақ біз олардың соғысты аяқтауға ниеті барын әзірге көріп отырған жоқпыз», — деді ол.
Бұған дейін Путин Қытайға сапары кезінде Мәскеуде Зеленскиймен кездесу мүмкіндігін жоққа шығармайтынын мәлімдеген. Алайда ол мұндай диалогтың қажеттілігіне күмән келтіріп, Украина президентінің заңдылығына қатысты мәселені тағы көтерді.
Ресей президенті сондай-ақ кездесуге бастамашы болған АҚШ басшысы Дональд Трамп екенін растады. Ақпарат құралдарының хабарлауынша, бұл әңгіме Вашингтондағы саммитте Украина мен Еуропа елдері қатысқан кезде қозғалған.
Кейін Трамп журналистерге берген сұхбатында Путин мен Зеленскийдің әзірге қақтығысты реттеу жөнінде келіссөздерге дайын емес екенін айтты.
Одан бөлек, Трамп Парижде бас қосқан Зеленский және еуропалық көшбасшылармен телефон арқылы сөйлесті. Баспасөз мәслихатында Макрон 26 мемлекеттің Украинаға өз күштерін жіберуге әзір екенін, бірақ мұндай қадам тек атысты тоқтату жүзеге асқанда ғана мүмкін болатынын мәлімдеді.