Қаһар Бинахметов 
«Кристалл менеджмент» акционерлік қоғамы 2024 жылды шығынмен аяқтап, акционерлерге дивиденд бөлмеу туралы шешім қабылдады, деп жазады ZontNews.kz.
Компания Тимур Құлыбаевқа Joint Resources холдингі арқылы тиесілі. Ақпарат Қазақстан қор биржасының (KASE) материалдарында жарияланды.
Қаржылық есеп деректеріне сәйкес, кәсіпорынның шығыны 500 миллион теңгеден асты. Сол себепті табыс үлесін бөлу көзделмеген.
«2024 жылға таза табыс болмағандықтан, табысты бөлу тәртібі бекітілмесін және бір қарапайым акцияға дивиденд мөлшері белгіленбесін» деп жазылған акционерлердің ресми шешімінде.
Компания акцияларының 51 пайызы Joint Resources-ке тиесілі. Қалған үлестер «Евроазия Констракшн» ЖШС (Асқар Әубәкіров пен Қайрат Қырымов), «Позитив-А» АҚ (Жұмабике Жилбаева) және «FCI Management LLP» ЖШС (Раушан Сәгдиева) иелігінде.
«Кристалл менеджмент» Қызылорда облысындағы Сұлұтабан кен орнында барлау жұмыстарын жүргізіп жатыр. Жоба әзірге өндірістік кезеңге өткен жоқ. Бұған дейін де Құлыбаевқа қарасты кейбір компаниялар қаржылық көрсеткіштердің теріс болуына байланысты дивиденд төлеуден бас тартқан.