Қаһар Бинахметов 
Цифрлық штаб премьер-министр Олжас Бектенов басшылығымен мемлекеттік қызметтерді онлайн алу мүмкіндігін жеңілдету жөнінде шара қабылдады, деп жазады ZontNews.kz.
20 қыркүйекке дейін Smart Bridge платформасы арқылы жеке IT-шешімдерді мемлекеттік сервистерге қосу процесі жеңілдетіледі.
«Бұл кәсіпкерлерге жаңа цифрлық өнімдер ұсынуға мүмкіндік береді, ал азаматтар мемлекеттік қызметтерді жылдам әрі ыңғайлы ала алады», – деді штаб өкілдері.
Сонымен қатар, Qaztech платформасында IT-шешімдерді әзірлеуге қойылған баға мен мерзім шектеулері алынып тасталады. Енді отандық технологияларды пайдалана отырып, ірі және заманауи жобаларды іске асыруға болады.
15 қыркүйектен бастап азаматтар мобильді телефонында теңгерімі нөл немесе теріс болса да eGov, eGov Business, Aitu және eOtinish порталдарын пайдалана алады.
«Бұл мемлекеттік қызметтерге тұрақты қолжетімділік береді және Халыққа қызмет көрсету орталықтарының жүктемесін азайтады», – деп хабарлады үкімет.
Жыл соңына дейін билік цифрлық мемлекеттік қызметтерге жасанды интеллект енгізуді жоспарлап отыр. Бұл мемлекеттік көмек алуды жылдам әрі ыңғайлы етеді, көптеген үдерістер автоматтандырылып, проактивті форматқа көшеді.