Қаһар Бинахметов 
Қазақстан Үкіметі алдағы жылу маусымына өңірлердің дайындығын кешенді түрде тексеріп жатыр. Энергетикалық инфрақұрылымы ескірген және апат қаупі жоғары аймақтарға ерекше назар аударылды, деп жазады ZontNews.kz.
Премьер-министрдің тапсырмасы бойынша жұмыс топтары өңірлерге барды. 20 тамызда кеңесшілер Ермек Маржықпаев пен Ералы Тоғжанов Абай және Маңғыстау облыстарындағы дайындық барысын тексерді.
Семейде Ермек Маржықпаев «Ғаббасова», «Центр», РК-3, ТЭЦ-1, РК-1 және 103-103А қазандықтарындағы жұмыстармен танысты. Қаладағы жылу көздерінің орташа дайындығы 86% құрады. Әлі 12 нысанда жөндеу жалғасуда. Жалпы облыс бойынша 23 энергия көзі мен 26 шақырым жылу желісінде жұмыс жүргізілуде. Қазіргі дайындық деңгейі 82,8% болып отыр. Жыл соңына дейін желілердің тозу деңгейі 59,4%-дан 56,6%-ға төмендеуі тиіс.
Маңғыстау облысында Ералы Тоғжанов «МАЭК» кәсіпорнын тексерді. Жоспарлы жөндеулер уақытылы жүргізілуде: ТЭС-2 энергоблогы қалпына келтірілді, ТЭЦ-2 және ТЭЦ-1 нысандарында жұмыстар жалғасуда. Ақтауда 44 шақырым магистральдық және 10 шақырымнан астам ішкі кварталдық жылу желілері ауыстырылуда. Бұл желілердің тозуын 79%-дан 75%-қа төмендетеді. Өңірдегі тұрғын үйлер мен әлеуметтік нысандардың дайындығы шамамен 80% деп бағаланды.
Үкімет бұл жұмысты ерекше бақылауда ұстап отыр.