Қаһар Бинахметов 
Актөбе теміржол вокзалында поезд басшысын өлтіру ісі бойынша тергеу жүріп жатыр. 47 жастағы ер адам перронда пышақ жарақатынан қаза болды, деп жазады ZontNews.kz.
Полиция дерегінше, белгісіз ер адам марқұмға жақындап, темекі сұраған. Бас тартқан соң күдікті пышақпен алты соққы жасаған.
КТК телеарнасы хабарлағандай, бақылау камералары шабуылды толық жазып алған. Кадрларда қаскүнемнің пышақтың қанын сүртіп, камераға қарап, оқиға орнынан асықпай кеткені көрінеді. Полиция бейнежазбаны жариялаған жоқ.
28 жастағы күдіктінің бұрын сотталғаны және пробациялық бақылауда болғаны белгілі болды. Ол қамауда отыр, іс қасақана адам өлтіру бабымен тергелуде. Қылмыстың себебі айтылмады.
«Жолушылар тасымалы» АҚ баспасөз хатшысы Нариман Дюсекеевтің мәліметінше, марқұм оқиға кезінде демалыста болған. Компания отбасы мен туыстарына материалдық көмек көрсетіп, көңіл айтты.